Loading...
Цисплатинаар үүсгэгдсэн хулганы өндгөвчийн анхдагч дутмагшилд өөхний эдийн гаралтай үүдэл эсийн эмчилгээний нөлөөг тодорхойлсон дүн
Зохиогч
Он
2026 оны есдүгээр сарын 15
Төрөл
journal article
Journal
Эрүүл мэндийн шинжлэх ухаан
Volume
22
Issue
6
Start Page
189
End Page
193
ISSN
2959-6947
Хураангуй
Үндэслэл: Цисплатин нь олон төрлийн хорт хавдрын эмчилгээнд өргөн хэрэглэгддэг платин агуулсан хими эмчилгээний эм боловч өндгөвчийн эд, ооцит болон хөгжиж буй фолликулд гонадотоксик нөлөө үзүүлж, өндгөвчийн анхдагч дутмагшил үүсгэх эрсдэлтэй. Өөхний эдийн гаралтай үүдэл эс (ADSC) нь паракрин, антиапоптоз болон эдийн нөхөн төлжилтийг дэмжих боломжит нөлөөгөөрөө өндгөвчийн гэмтлийн дараах сэргээх эмчилгээний нэг хувилбар болж судлагдаж байна. Зорилго: Цисплатинаар үүсгэгдсэн POI хулганы загварт ADSC эмчилгээ эструсын мөчлөг, биеийн жин болон өндгөвчийн фолликулын морфологийн сэргэлтэд үзүүлэх нөлөөг үнэлэх. Арга, аргачлал: Судалгаанд 6 долоо хоногтой нийт 30 BALB/c эм хулгана ашиглав. Хяналтын бүлэгт 6 хулганад салин, 24 хулганад цисплатиныг 2 мг/кг тунгаар хэвлийн хөндийд өдөрт нэг удаа 10 хоног тарьж POI загвар үүсгэв. POI үүссэний дараа цисплатин хэрэглэсэн амьтдыг эмчилгээ хийгдээгүй POI бүлэг (n=15) болон ADSC эмчилгээний бүлэг (n=9) болгон үргэлжлүүлэв. ADSC бүлэгт 1×10⁶ эсийг 0.2 мл орчинд суспензлэн сүүлний венээр тарив. Үтрээний наацыг өдөр бүр хянаж, эструсын мөчлөгийг proestrus, estrus, metestrus, diestrus үе шаттайгаар үнэлэв. Туршилтын төгсгөлд өндгөвчийг авч гистологийн шинжилгээ хийв. Үр дүн: Цисплатин хэрэглэсний дараа эструсын мөчлөг хяналтын бүлгийн 3.97 хоногоос POI бүлэгт 6.4 хоног болж уртассан (p<0.05). ADSC эмчилгээний дараах үнэлгээнд эмчилгээ хийгдээгүй POI бүлгийн мөчлөг 5.65 хоног (n=4), ADSC бүлгийнх 4.5 хоног (n=7) байсан бөгөөд ялгаа статистикийн ач холбогдолтой байв (p=0.013). Гистологийн хувьд POI бүлэгт фолликулын атрофи, сөнөрөл, дегенератив өөрчлөлт давамгайлсан бол ADSC бүлэгт анхдагч, хоёрдогч болон антрал шатны хэвийн төрхтэй хөгжиж буй фолликулууд илүү олон, дегенератив өөрчлөлт харьцангуй бага байв. Өндгөвчний гистологи зүслэгт суурин болон хөгжиж буй фолликудын тоо хяналтын бүлэгт 15.00±2.65, POI бүлэгт 6.00±2.00, ADSC бүлэгт 8.67±2.89 байв. Дүгнэлт: Цисплатинаар үүсгэгдсэн POI хулганы загварт ADSC эмчилгээ хийснээр эструсын мөчлөг статистикийн ач холбогдолтой богиносож хэвийн түвшин рүү ойртсон. Өндгөвчийн гистологид анхдагч, хоёрдогч болон антрал шатны олон төрлийн морфологи бүтэц бүхий фолликулууд нэмэгдэж, хатингаршиж дегенератив өөрчлөлтөд орсон фолликулууд буурах хандлага ажиглагдав. Иймээс ADSC эмчилгээ нь цисплатинаар үүсгэгдсэн өндгөвчийн гэмтлийн дараах фолликулогенез болон эструсын мөчлөгийг хэсэгчлэн сэргээх боломжтойг энэхүү судалгаа харуулж байна.
Background: Cisplatin is a widely used platinum-based chemotherapeutic agent, but its gonadotoxic effects can damage ovarian tissue, oocytes, and developing follicles and may lead to primary ovarian insufÏciency (POI). Adipose-derived stem cells (ADSCs) are being investigated as a potential regenerative treatment because of their paracrine, anti-apoptotic, and tissue-repair effects. Aim: To evaluate the effect of ADSC therapy on estrous cyclicity, body weight, and ovarian follicular morphology in a mouse model of cisplatin-induced POI. Materials and Methods: Thirty 6-week-old female BALB/c mice were included. Six mice received saline as controls, while 24 mice received cisplatin 2 mg/kg intraperitoneally once daily for 10 days to induce POI. After POI induction, cisplatin-exposed animals were continued as an untreated POI group (n=15) or an ADSC-treatment group (n=9). The ADSC group received 1×10⁶ cells suspended in 0.2 mL medium via the tail vein. Body weight and vaginal cytology were monitored daily, and estrous stages were classified as proestrus, estrus, metestrus, and diestrus. Ovaries were collected for histologic evaluation at the end of the study. Results: After cisplatin exposure, mean estrous cycle length increased from 3.97 days in controls to 6.4 days in the POI group (p<0.05). During the post-treatment evaluation, mean cycle length was 5.65 days in untreated POI mice (n=4) and 4.5 days in ADSC-treated mice (n=7), representing a statistically significant improvement after ADSC therapy (p=0.013). Cisplatin caused significant body-weight loss, reaching a mean of 18.0 g on day 6 after completion of cisplatin administration (p<0.01). Histologically, untreated POI ovaries showed follicular atrophy and prominent degenerative changes, whereas ADSC-treated ovaries showed more morphologically preserved primary, secondary, and antral follicles and relatively fewer degenerative changes. Exploratory manual counting in three representative whole-ovary sections per group showed total intact/growing follicle counts of 15.00±2.65 in controls, 6.00±2.00 in POI, and 8.67±2.89 in ADSC-treated ovaries. Conclusion: ADSC treatment was associated with partial restoration of estrous cyclicity and ovarian follicular development in a cisplatin-induced POI mouse model. These findings support further investigation of ADSC-based regenerative therapy for chemotherapy-associated ovarian injury.
Нэмэлт мэдээлэл
Бүрэн эх: https://journal.mnums.edu.mn/index.php/emsu/article/view/1769
Эшлэл
Б.Баярманлай, Б.Дэлгэрмаа, С.Сэржням, Б.Хонгорзул, Ц.Анужин, Ц.Чимгээ нар. Цисплатинаар үүсгэгдсэн хулганы өндгөвчийн анхдагч дутмагшилд өөхний эдийн гаралтай үүдэл эсийн эмчилгээний нөлөөг тодорхойлсон дүн. Эрүүл мэндийн шинжлэх ухаан. 2026;22(6):189-193.